Jasper & Jayden 的閱讀樂

今天竟然遲了起身, 幸好, 也趕得及check out, 食早餐及上去層雲峽的車

今天在札幌很大雪, 雪粒十分大, 令地上都舖滿雪, 好靚呢....

睇下, 路面都是白色, 完全睇唔到邊到係馬路, 邊到係行人路

早餐本想試下旅遊書介紹的餐廳, 怎料書只說在札幌站, 但郤找不到, 結果找了間西式早餐試試, 都ok好味道

(奇怪, 我明明記得我有影相的, 回來郤找不到~~~~ 呢餐都好好味的)

食完, 己11點了, 去札幌北口找朝陽亭的人, 登記好, 便等車到

上到車, 雪好像越下越大, 幸好今天不是戶外活動...不然, 都頗麻煩

1點半左右, 到達中途站, 可以下車去洗手間及買點東西, 見到好多龍貓精品, 買了個磁石站勾, 可以掛點小東西, 貓巴士還有左右動的, 好可愛的

可惜只有15分鐘左右, 不能慢慢看, 然後又上車.....

4 點左右到達酒店, 先check in, 房間是和洋式, 在房內食的, 先約了今晚7點食晚餐

呢邊係和式個邊, 另一邊就係雙人床了~~~

本來層雲峽附近是有條溫泉商店行的, 但....在大風大雪之下, 我們都決定先在房內休息一下, 浸一下溫泉, 待食完晚飯後, 便可乘車去冰爆祭, 酒店有車往返冰爆祭會場的, 頗方便

講返溫泉, 這間酒店有2個溫泉, 一個是在2/f 的露天風呂, 另一個是在7樓是室內風呂, 在地圖, 室內風呂比較大, 先試過個

入到去, 先沖涼, 是很日式那種, 跟漫畫內的一樣呢... (幸好是有花灑的, 若只有水盆....真的很難沖!!) 之後, 當然要試試浸溫泉啦, 水溫不是太高, 像平日沖涼的水溫差不多, 池頗大, 可以望外邊的景色, 都唔錯

溫泉外還有按摩椅可以relex 一下, 浸完按摩一下, 頗舒服的, 當然還要食杯雪糕, 好正呀

回到房間, 己差不多7點, 收拾一下, 晚餐便到了

普通日式料理的樣子, 款式頗多, 但每款份量頗少, 可能今晚要食杯麵呢

(事實係, 最後都無食宵夜, 只係浸完溫泉食了雪糕.....)

食完, 己是8點半, 打電話搵人收拾好, 換好衫就出發去睇冰爆祭了

酒店內都可以看到冰爆祭的會場, 一個大大的雪人頭

我們上到酒店的專車, 才發覺我們忘了換雪褲, 而外邊刮著大風雪, 是真的勁大風和大雪

落了車, 己考慮是不是應該回去, 因為實在太大風, 雪打在面上十分痛的-,-

(呢個就係入口啦..... 睇下幾大雪.....仲好大風添~~~)

睇下, 幾凍.....幾大風

但, 一場來到, 最少要行一轉, 我們冒著大風雪前進, 好快到入口, 先行樓梯落去會場....勁凍呀, 狂流鼻水....可能鼻水都結了冰....入口附近有好多間冰屋, 入到冰屋, 感覺暖好多呢....

呢張就係冰屋內影的, 真係好暖架.... 有無睇到我d 裝備, 冷帽 加耳罩再加羽絨的帽~~

現場睇, 打晒燈是好靚的, 但影相要加上閃光燈, 便看不到打燈的顏色

到真正冰爆山洞的外邊, 還有溫度計, 看一看, 原來是負17度呀, 真係勁....我講緊我件羽絨, 係咁凍既環境, 我個身一點也不凍....但面, 手, 和腳凍到刺痛

入到冰爆的山洞, 好靚, 一條條冰柱由上而下, 配上五顏六色燈光效果, 超級正呢, 可能路比較窄 (基本上只夠一個人行) 本想影多一點相, 但又怕阻到別人, 只影了一點, 而且, 很難影到燈光效果呢, 而且, 途中相機還有霧氣呢....又要整整才能再影, 而電池又要換....

睇下...凍到我都唔識笑了~~

(我地既相機都係比較差, 影唔到好靚既效果~~~)

離開山洞, 還有座小山, 行冰樓梯上去, 可以望到會場, 可惜太大雪了, 影相出來只見到雪.....
若今天不是這?大雪, 應該還會再留多一會的, 但, 太大風了, 手開始勁痛, 所以快快行晒便離開

回到酒店的車的途中, 覺得手腳好像不是自己的, 實在太凍了

上到車, 開始覺得手腳發熱, 直至回到酒店才好一點

在酒店的小賣店買了杯麵, 和布丁, 老實說, 雖然北海道的牛奶十分出名, 但我覺得布丁更正

回房間休息一會, 再去試試位於2樓的露天風呂

這個露天風呂是分室內和室外的, 2個的泉水都是掛流式, 跟7樓不同, 感覺更正呢! 室內的泉水比7樓的熱一點, 但也細一點, 試完室內的, 當然要試下室外的, 一打開門....好凍....心想, 好不好出去呢, 好凍喎, 剛好有個女人入來, 可能見我們考慮緊, 便入去, 然後我們便跟進去, 感覺到好凍呀, 立即入泉水內, 好舒服呢, 熱熱的, 有點雪, 不過雪未下來己變成水....

可能因為這邊的泉水比較熱, 浸了一會便出去室內的浸多一會便離開了, 但等好耐還未見oscar 他們出來, 幾乎以為他們暈倒在溫泉添

浸溫泉太正了, 明天要早一點起身再浸才離開....

(為左等大家明白外邊有幾凍, 我專登影左呢2張相, 房內的窗都係雙層的, 當打開裡面既窗, 就會看到外邊的窗內竟然佈滿了雪花......可想而知....)

明天便去小樽了, 好正呀, 我要整音樂盒同玻璃......另外, 明天的溫泉旅館還有私人風呂添....