Jasper & Jayden 的閱讀樂

近期熱話
港台的中女宣言, 還有不同的人的反應
今日終於上you tube 睇左成套, 仲睇埋袁爾明既回應

感覺是....
唔明白點解港台既所謂中女都係一面倒架呢
有個話, 自己做左4年第三者
身邊好多人都有做過第三者
講到好似係女人都試過咁
如果你本身唔接受, 第一時間走左啦

好奇怪
如果想搵個固定的男友, 結婚生仔
為什麼會揀做第三者?
如果呢個男人今日為左你離婚
他日都會為其他人而離開
我唔覺得做第三者係拍拖, 戀愛
因為3個人既戀愛太多了, 太複雜
即使本來唔知, 一旦知道, 無理由拖下去
好明顯呢個男的一早不懷好心

好多人話呢個世界, 好男人都比人揀晒
咁點解人地揀到, 你揀唔到?
可能有d 人本身己揀左
最後又散左
分開既原因可以有好多
十多歲, 廿多歲,  剛出來工作
要求身邊和你差不多年紀既人, 又細心又体貼, 又搵到錢~~
嘩, 咁既白馬王子, 去邊到搵呀
你估通街都係咩~~
拍拖, 戀愛, 要的是愛情嘛
又不是和條件拍拖
年紀輕輕, 要有樓有車, 一係屋企大把, 一係好叻好勁
2者都係少數, 既然係咁, 不如腳踏實地, 找個和自己差不多既人
至少可以溝通到
一齊努力工作, 搵錢, 過得十年八載
呢d 男仔咪變左中女口中既好男人囉
廿多歲時不努力維繫感情
好難怪到中女時找不到

至於事業心重
袁爾明講得真係幾0岩
路係自己揀既
廿多歲時努力工作, 得到事業, 換不了愛情
好難要求一個, 朝9晚11既女仔, 搵到另一伴呀
你留咁多時間比佢, 咪即係比機會佢走路?
朝9晚6, 得閒行街睇戲食飯, 增進感情
不要說男朋友,
即使是朋友也好, 親人也好,
好日都唔見下既話, 感覺好極有限啦
有事業唔係唔好, 不過, 工作時工作, 放假時放假
又不是賣身, 又不是機械人
到老時, 公司唔會因為你勤力而養你一世架

而打扮, 化裝, 女人味
化裝, 即使不是因為想吸引人
自己扮靚d, 心情都好d 啦
無可否認
識朋友, 第一個印象, 一定是外表
這是不論男女的
難道你第一眼睇到乞丐, 你會有feel? 我唔信囉
既然係咁, 花少少錢, 少少時間, 執靚自己, 有乜問題?
唔好話識男仔啦
你外表靚d
見工, 見客機會都大d 啦
不過, 短頭髮有短頭髮既清爽
除非短到好似男仔, 著得又成個男仔咁
不然, 髮形呢d, 個人喜好, 好多明星都係短髮啦
一樣好靚架

到姐弟戀呢個話題...
有戀愛感覺, 熱情, 但又覺得對方不夠成熟
但, 這才是年青呀...
如果對方成熟, 拍拖就無咁熱情如火啦
既然對方唔成熟, 你同得佢一齊, 都預左架啦...
不過, 佢今日唔成熟, 將來會嘛....
睇你呢一刻要乜囉
如果你只係想要個肩膀,
成唔成熟有乜關係?
但你又唔好要求人地可以養得起你啦喎
正所謂, 有得必有失嘛

講到尾
如果發展一段感情時,
諗少d 野, 咪會順利d 囉
對方係咪事業有成, 係咪有車有樓, 係咪有高尚職業
重要嗎?
最重要係, 雙方係咪有愛嘛
當然, 有愛之餘, 我是絕對唔認同因為有愛而做第三著
因為, 如果一個男人真係咁愛你,
咁佢唔會要你做第三者囉
不能見光既感情
呢個男人, 重視極有限