Jasper & Jayden 的閱讀樂

去旅行, 點少得食好野, 如果你去旅行只為shopping, 食個飯團做三餐既話, 呢一篇可以skip 左去!! 如果唔係既, 就一定要睇定關西有咩好野食啦~~~~

和牛

日本三大牛之二：神戶牛(三田牛)，松阪牛都出自關西；所以，去到關西，你又點可以唔試試世界知名o既和牛？

神戶牛
世界知名o既神戶牛，其實係神戶附近牧場(多數係三田飼養，有優良血統o既但馬牛)，乎合某個極高標準之後至可稱為神戶牛。神戶o既三宮，元町站有各式各樣餐聽供應神戶牛；因神戶為外國人聚居o既地方，所以神戶牛亦係日本同西式文化o既結晶品，通常以西餐方式食用。

蔡瀾介紹過o既飛苑，食炭燒三田牛，散叫200g賣7000円；set包300g三田牛，飯，牛骨湯同salad，12000円：

其實想平d既，好多人o既做法係去食lunch set，通常5-6000yen已有唔錯o既選擇。無線介紹過o既大井，Lunch set約5500yen，但要預約。另東京都有分店o既三田屋，本店都嚮神戶。想再平d既，可以去呢間Steakland(ステーキランド)，神戶牛lunch set都係2980yen；但呢間有網友讚，亦有唔少人彈~

呢間Mouriya個lunch set都幾抵食，4700yen已經有150g既神戶牛set，但要1日前打電話book位，仲要指明食special lunch至有得平：


松阪牛
食松阪牛最抵食當然係嚮松阪，仲可以順便去松阪d牧場睇下日本人點樣用啤酒同d牛按摩。去唔到松阪o既，嚮大阪都有唔少食松阪牛o既餐廳。呢間松阪牛燒肉M嚮大阪有幾多分店，價錢唔算好貴，晚餐5-7000yen都有交易。

河豚

大阪佔全國約6%河豚消費量，可謂全國之最；所以嚮大阪，幾乎通街都搵到食河豚o既餐廳。一般河豚料理會包括生熟兩食：剌身以切得越薄，可以見到碟o既圖案為之越正。熟食以火鍋為主，用清湯灼熟河豚肉；食完之後，侍應會將飯放入火鍋，再煮熱成泡飯。咁樣o既一餐河豚料理約5至7000yen一位；值唔值得就見仁見智喇！但要留意，因河豚乃毒物，食用始終會有危險性。

大阪一般連鎖或老字號河豚料理店都已有河豚烹調資格，通常店前都有隻河豚標記：


呢幾間連鎖店都好多人去：太政 玄品 Zuboraya
另黑門市場o既浜藤評價都唔錯！

京料理

懷石料理
以不使用濃烈的調味品、強烈的辛辣佐料，來保持材料原來風味而見稱的料理。但一餐正宗懷石料理閒閒地要成千元港幣！想平d既，可以選擇懷石午餐。除二、三年坂，四条，祇園一帶o既京料理店舖之外，嚮南禪寺附近o既洛翠，環境唔錯，京會席lunch約5000yen。

川床料理
料理店搭建於河流上面，令客人有如置身河床上面食o野咁，特別涼快。川床料理只限夏天於京都貴船、鴨川供應。部份川床料理店如ひろ文，仲會有流水麵(流しそうめん)食tim！




湯豆腐
其實所謂湯豆腐，即係將豆腐放嚮煮著熱水o既鍋裡保溫食用，並唔係「豆腐湯」o黎。京都各寺廟，嵐山一帶都有唔少湯豆腐料理店舖；當中以老舖奥丹同順正名氣比較大。想經濟d既，清水寺裡面都有檔湯豆腐，用木桶盛裝，500円已有交易：


另嵐山路邊小檔都有好多350円一客湯豆腐同250円豆腐軟雪糕~

魚生，海鮮

可能大阪食河豚太出名，以至令很多人忽視關西魚，海鮮料理。其實大阪中央市場每朝都有新鮮魚獲由關西各地運到；紀伊半島更加係3面環海，魚獲種類之多和豐富，其實絕對唔比日本其他地方輸蝕。

伊勢海老
亦即係我地口中o既龍蝦，係紀伊半島o既名物。伊勢海老比香港食開o既龍蝦細隻，通常會用o黎刺身或者阪燒。嚮臨海溫泉區如伊勢，鳥羽，志摩，勝浦，白濱一帶尤其多食伊勢海老店舖；溫泉酒店晚餐亦好多會有伊勢海老食。若去開和歌山黑潮市場和白濱Toretore市場，不妨買o黎一試。

越前螃蟹
又名椿葉蟹或松葉蟹，只在冬季至有得食；如果冬天去開兵庫縣o既城崎溫泉就千祈唔好錯過！

吞拿魚(鮪)
勝浦同串本都盛產吞拿魚，尤其係勝浦，勝浦漁港更加係全日本吞拿魚產量最多o既魚港之一：


去開勝浦，唔好忘記去勝浦築地試試係果度至有得食o既吞拿魚內臟料理：


和歌山黑潮市場同白濱Toretore市場每天都有吞拿魚由串本和勝浦漁港運到，約lunch時分會有湯吞拿魚表演。

大阪市內食店

道頓堀

蟹道樂本店(かに道樂)
門口有大大隻識郁o既蟹招牌，以螃蟹料理見稱，幾乎係香港人必去o既食店。想平d既，可以去食set lunch，2-3千幾yen都有交易！


金龍拉麵
提佢o既原因，只係想叫大家唔好去....嚮難波求其搵一間拉麵店都好食過佢！

燒章魚丸
大阪地道小食之一，嚮道頓堀通街都搵到！除老店本家日本一大たこ之外，另道頓堀極樂商店街7樓仲有間蛸やくし，可以自己燒o既自助章魚丸店，每張檯都有個章魚丸爐頭，好似幾得意咁。

大阪燒餅Okonomiyaki
另一源於大阪o既地道食品，意思係「隨你喜好」；所以，其實燒餅o既材料好多時都係任你自己配搭。通常會用蔬菜，海鮮，肉類等材料；略煎後再加入麵粉漿，最後再加大量醬汁，蔥，沙律醬，木魚絲等等....所以非常飽肚！


串家
唔少香港人去，食自助式炸物放題；想去o既記得印coupon。

自由軒
另一大阪名物，專食一種炒得好濕，中間加隻生蛋o既咖哩飯。

黑門市場

其實係個類似街市咁o既地方，裡面有唔少新鮮食物售賣，如肉類，河豚，生果等，亦有少量食店。裡面有兩檔60円一杯鮮豆漿，豆味非常濃，必試！

法善寺橫丁
夫婦善哉
專食日本紅豆沙湯丸既店舖~

魚心壽司
除好多人去過o既梅田本店之外，法善寺橫丁都有分店。

阪急東通商店街
嚮梅田區阪急百貨店東側，非常多食店，所以夜晚勁熱鬧，係住梅田區必去o既食街。

京橋
大阪o既商業區；特別之處，係放工時間會有唔少「屋台」，即係好似香港大排檔咁o既食店。其中人氣屋台「居酒屋とよ」，以抵食海膽魚子壽司聞名。

青木松風庵
佢o既cheesecake，士多啤梨大福/葡萄大福都好好味，必試！



搵食Tips
去日本之前，大家不妨去呢幾個日本搵食網站望望，睇下想去o既食店有冇coupon，印定出o黎分分鐘慳唔少！
http://www.gnavi.co.jp
http://gourmet.yahoo.co.jp
http://www.hotpepper.jp
http://www.walkerplus.com/gourmet

引用: http://www.discuss.com.hk/viewthread.php?tid=4325627