Jasper & Jayden 的閱讀樂

鍾意浸溫泉的話，關西絕對係會令你一去再去o既地方，因為整個關西都遍佈出名o既溫泉區！

有馬溫泉

最有名既關西溫泉，要算係距離只係約一個多小時車程既有馬溫泉。位於兵庫縣o既有馬溫泉係日本三大著名溫泉之一，裡面既溫泉因為有礦物質而令泉水似「金」同「銀」色，所以稱為金湯，銀湯，分別有不同療效。

正因為有馬近大阪，所以好適合d逗留關西時間唔耐o既遊客，選擇「日歸」->即係即日來回，只俾浸溫泉費用。除開放俾公眾又非常歷史悠久o既「金の湯」同「銀の湯」之外，其實好多有馬溫泉酒店都有「日歸」，但部份要連一餐料理。可以參考呢度o既介紹：
http://www.arima-onsen.com/chu1/spa.html
http://rail.hankyu.co.jp/ticket/shosai/arimataikou-1.html

當然，除「日歸」之外，時間許可o既話，book個一泊二食plan住一晚就最正！因為有馬溫泉就嚮神戶附近，唔少有馬溫泉夜晚果餐懷石料理仲有神戶牛食tim！

有馬最出名o既酒店就係呢間Arima Grand：http://www.arima-gh.jp/ 但價錢幾貴，一泊二食要港幣約三千幾蚊一日

想平d既，可以選擇有馬view，住客可使用太閤の湯溫泉樂園：http://www.arima-view.com
或者陵楓閣，一泊二食約二千蚊，交通幾方便：http://www.negiya.jp/

有馬溫泉交通
可於梅田乘阪急巴士直達有馬溫泉站，單程1330円，約55分鐘：
http://bus.hankyu.co.jp/kinki/arima_h.html
http://bus.hankyu.co.jp/highway/highway10.html
或坐阪急/阪神電鐵至三宮，再轉神戶高速/神戶電鐵至有馬溫泉站。

白濱溫泉

位於和歌山縣，日本三大古湯之一o既白濱溫泉距離大阪乘JR約2小時，或乘巴士約3.5小時。白濱o既溫泉酒店幾乎都係沿海而建；所以，大部份酒店都有勁靚海景，部份溫泉更係對住海o既露天風呂！

白濱露天溫泉介紹：http://www.nanki-shirahama.com/spa/

雖然白濱比有馬遠，但白濱一般酒店都比有馬平，一泊二食約千幾二千蚊已經有唔錯o既酒店；想再平d，白濱亦有唔少民宿可以選擇。白濱比較有名o既酒店有梅樽溫泉酒店：http://www.seamore.co.jp/

佢係用浸梅o既木桶盛溫泉水。梅樽隔籬o既草原の湯就係我一邊浸住露天溫泉一邊睇日落果度：http://www.onsenpark.com/index1.html

柳屋都唔錯；間房有靚海景，溫泉出面仲有按摩椅服務：http://www.yanagiya-hotel.jp/


講白濱，又點可以唔提呢個只係三百幾円入湯費，但就海天一色o既公衆露天溫泉「崎の湯」呢：


其實白濱附近都有好多明勝如三段璧，円月島，Toretore海鮮市場等；若時間容許都幾值得去玩一至兩日！




白濱溫泉交通
明光巴士由大阪至白濱約3.5小時，5000円(包來回兩程)：http://www13.ocn.ne.jp/%7Emeikobus/kousoku/index.html
乘JR Ocean Arrow由大阪至白濱約2.5小時，單程4620円。

勝浦溫泉

離大阪乘JR都要3個幾4個鐘！雖然好遠，但單單一間浦島酒店，就已經值得：
http://hotelurashima.co.jp/onsen/onsen.htm

浦島酒店非常大，一間酒店裡面已經有6個溫泉區，而每個溫泉區又有3至4個溫泉池。其中一個溫泉「忘歸洞」係天然洞穴溫泉，海天一色，非常出名！




另外勝浦o既中の島溫泉酒店亦以島中露天溫泉聞名

勝浦附近亦有唔少景點，包括世界遺產熊野古道，那智大社，那智瀑布，同全日本吞拿魚產量最高o既勝浦漁港。你亦可以去附近太地海豚基地親親海豚，或去串本海中公園睇海龜。


關西溫泉區仲有城崎溫泉，龍神溫泉，虹原溫泉，蘆原溫泉等等等等，真係多到講都講唔晒！

大阪市內溫泉

若果真係冇時間去關西溫泉區浸溫泉，亦可以考慮比較人工化o既大阪市內溫泉；呢兩個都幾多人去，仲有部份溫泉可以穿泳衣：
世界の大溫泉： http://www.spaworld.co.jp/
La Spa：http://www.laspaosaka.com/


浸溫泉須知

一般日本溫泉都唔可以穿泳衣，或用毛巾包住身體入溫泉，除非特別說明。浸溫泉前一定要沖亁淨身體，然後只拿一塊小毛巾用作步行時蓋住重要部位，同浸溫泉時放嚮頭頂散熱。注意，毛巾係唔可以放入溫泉裡面，以確保水質唔受污染。

日本溫泉通常都唔可以男女一齊浸，除o左一d可穿泳衣o既溫泉樂園，或一d好古老o既「混浴」溫泉(通常婆婆至肯去)。想同另一半一齊浸溫泉，可以選擇以下方法：

1) 去一d可穿泳衣o既溫泉樂園，如La Spa或Spa World。

2) Book一間有「貸切風呂」(即私家溫泉)o既溫泉酒店。呢d貸切風呂一般按時間收費，去之前要先預約。

3) Book一間有「風呂付客室」(即間酒店房裡面有私家溫泉)o既溫泉酒店住一晚；但呢d房一般比普通房間貴約一倍！

另要留意，血壓高或心臟病患者不宜浸溫泉；健康人仕亦應適可而止，浸約15分鐘就休息一陣。

希望大家嚮日本嚮受浸溫泉樂趣o既同時，亦幫忙尊守浸溫泉o既規條，愛惜溫泉資源，做個有公德心o既旅客！